ඌව පළාත

ඌව පළාත

පළාත් ගීතය

දේශ දේශ කිතු ගසේ නැගු භූමී
දේශ දේශ අභිවන්දී භූමී
ශාක්‍ය සිංහ හිමි තෙද පෑ භූමී
උදාර හෙළ භූමී - ඌව විජය භූමී

සීත නමුණුකුල කඳුවැටි හෙවනයි
දුන්හිඳ - දියලුම ගලනා සිහලයි
වෙල්ලස්සේ ගලනා රණ ගීයයි
අභීත - රණවිරු නිජ බිම ඌවයි

මුතියංගන මියුගුන සෑකිරණයි
කන්ද කදිර හිමි දෙවි රැක වරණයි
වීර මොනරවිල එඩි පෑ දෙරණයි
සිංහ කොඩිය සහ අසිපත මෙතනයි

            පළාත් පුෂ්පය

පුෂ්පය: ගුරුළුරාජ

උද්භිද විද්‍යාත්මක නාමය Rhynchostylis retusa Blume

කුලය Orchidaceae

රාම රාවණා යුගයේ සිට පැවත එන දිගු ඉතිහාසයකට උරුමකම් කියන ඌව පළාත ගෞතම බුදු රදුන්ගේ පාද ස්පර්ශය ලද පුණ්‍ය භූමියකි. නැගෙනහිර , මධ්‍යම, දකුණු හා සබරගමුව පළාත් වලින් මායිම්ව ඇති ඌව පළාත බදුල්ල හා මොණරාගල යන පරිපාලන දිස්ත්‍රික්ක දෙකකින් හා ප්‍රාදේශීය ලේකම් කොට්ඨාශ 26 කින් සමන්විතය. පළාතේ වපසරිය වර්ග කිලෝ මීටර 8500ක් වන අතර විශාලත්වය අතුරින් 4 වන ස්ථානයෙහි පවතින පළාත වේ.

ලාංකේය කෘෂිකර්මාන්තයේ සුවිශේෂී පංගුකාරීත්වයකට හිමිකම් කියන ඌව පළාතෙහි සිංහල රජ සමයේ සිට පැවත එන කෘෂිකාර්මික ගම්මාන අදටද දැකගත හැකිය. සාරවත් භූමිය, හිතකර දේශගුණික හා පාරිසරික සාධක, ජානමය උරුමයක්ව ගොවිතැනට දෑත හුරු ශ්‍රම බලකාය හා විශාල පරාසයක විහිදෙන භූගෝලීය සාධක හේතුවෙන් දේශයට ආහාර සැපයීමේ නිසඟ විභවතාවයකින් ඌව පළාත ආශිර්වාද ලබා ඇත. ජනගහණයෙන් 60 %ක ප්‍රමාණයක් කෘෂිකර්මාන්තය ජීවනෝපාය කරගෙන සිටින අතර සහල්, අර්තාපල්, බඩ ඉරිඟු සහ වෙනත් ධාන්‍ය භෝග , එළවළු , විවිධ පලතුරු සහ මල් වර්ග වගාවෙහි දක්ෂයෝ වෙති.

මුහුදු මට්ටමේ සිට අඩි 6000කට වඩා උසින් පිහිටි නමුණුකුළ කඳු වළල්ලේ සිට වැලිමඩ සානුව, කතරගම සේම හම්බන්තොට මුහුදු වෙරළ රමණීය ලෙස දර්ශනය වේ.ශ්‍රී ලංකාවේ අතිශය ජනප්‍රිය සංචාරක පුරවරයක් වන ඌව පළාත දුන්හිඳ, දියළුම, රාවණා ඇල්ල, බඹරකන්ද, හා බෝඹුරු ඇල්ල වැනි දිය ඇලි වලින් අලංකෘතය. යාල හා ගල් ඔය ජාතික වනෝද්‍යාන,මහවැලි ගඟ හා මැණික් ගඟ යන ගංඟා සේම සේනානායක සමුද්‍රය හා මාදුරු ඔය ජලාශද ඌව පළාතේ කැපී පෙනෙන සම්පත් වේ. මුතියංගණය, දෝව රජමහා විහාරය, බෝගොඩ ඓතිහාසික ලී පාලම, මාළිගාවිල බුදු පිළිමය, දෙමට මල් විහාරය, කතරගම දේවාලය, හා කිරි වෙහෙර වැනි ආගමික හා සංස්කෘතික දායාදයන් ඌවේ සංචාරක විභවතාවය ඉහළ නැංවීමට හේතු සාධක සපයයි. ඇඩිෂම් බංගලාව, ලිප්ටන් සීට්, ස්ත්‍රීපුර කන්ද හා දෙමෝදර ආරුක්කු පාලමද සංචාරක ආකර්ෂණය දිනා ගත් ඌවේ ජනප්‍රිය ස්ථානයන් ලෙස කැපී පෙනේ.

ශ්‍රී ලංකාවේ ආදිවාසී ජනතාවගේ නිජබිම් වන දඹාන, රතුගල, නිල්ගල, වැනි ප්‍රදේශ ඌවේ ජනතාවගේ පාරම්පරික උරුමයන් තහවුරු කරන ප්‍රදේශයන් වේ. ක්‍රි.ව 1630 දී ඌවේ සටන්කාමීන්ගේ සහභාගීත්වයෙන් පළවෙනි රාජසිංහ රජු සිදු කළ රන්දෙනිවෙල සටනත්, බ්‍රිතාන්‍ය පාලනයට එරෙහිව ඌවේ ජනතාව දියත් කළ 1818 නිදහස් අරගලයත් ඌවේ අභිමානය ලොවට කියාපාන ඓතිහාසික සිදුවීම් වේ.